सिमरा । जिल्ला प्रहरी कार्यालय बाराले किर्ते सवारी पास बनाउने प्रिन्टर सहित दुई जनालाई कलैयाबाट पक्राउ गरेको छ ।
प्रहरीले ना. १ ज ७२८८ न.ंको सुमो गाडीको धनी जिल्ला बारा कलैया उपमहानगरपालिका वडा न १७ बस्ने जयनारायण प्रसाद जैसवाल र पसल संचालक जिल्ला बारा कलैया उपमहानगरपालिका वडा न ३ बस्ने बर्ष ३० को गोपाल प्रसाद साहलाई पक्राउ गरेको हो ।
जयसवाललाई प्रहरीले शनिवार बाराको पथलैया चोक स्थित सडकमा सवारी साधनहरु चेकजाँच गर्ने क्रममा कलैयादेखि काठमाण्डौ जानको लागि आएको ना। १ ज ७२८८ न। को सुमो गाडीको कागजातहरु चेकजाँच गर्ने क्रममा पक्राउ गरेको हो ।
प्रहरीले जैसवालसँग जिल्ला प्रशासन कार्यालय बाराको छाप र अधिकृतको दस्तखत समेत किर्ते गरी बनाइएको नक्कली सवारी पास सहित पक्राउ गरेको हो ।
सो विषयको थप अनुसन्धान गर्ने क्रमम जयसवालले उक्त किर्ते पास कलैया ४ स्थित दाईभाई फोटो स्टुडियो एण्ड जनरल स्टोरबाट बनाएको भनि खुल्न आएकोमा उक्त पसल खानतलासी गर्ने क्रममा थप ३ थान नक्कली सवारी पास तथा उक्त पास बनाउन प्रयोग गरिएका उपकरण सहित पसलका संचालक गोपाल प्रसाद कलवारलाई पक्राउ गरेको हो ।
पक्राउ परेका दुवै जनालाई इलाका प्रहरी कार्यालय सिमरा बारामा राखी लिखत सम्बन्धी कसुर किर्ते मुद्दामा थप अनुसन्धान भइरहेको जिल्ला प्रहरी कार्यालय बाराले जनाएको छ ।
