निजगढ । श्री गौरीशंकर माध्यमिक बिद्यालय सडकटोल निजगढ नगर स्तरीय अन्तर बिद्यालय फुटबल प्रतियोगिताको क्वाटर र्फाइनलमा प्रवेश गरेको छ । आइतबार सम्पन्न खेलमा श्री नेपाल राष्ट्रिय आधारभुत बिद्यालय निजगढलाई टाइब्रेकरमा ४–२ गोल अन्तरले पराजित गर्दै गौरीशंकर मावी सडकटोल क्वाटर फाइनलमा प्रवेश गरेको हो ।
निर्धारित समयको खेल १–१ गोलको बराबरीमा सकिएपछि खेल टाब्रेकरमा गएको थियो । खेलको २२ औ मिनेटमा सेम पुलामी मगरले गोल गर्दै गौरीशंकरलाई अग्रता दिलाएका थिए । गौरीशंकरले शुरुआती अग्रता जोगाउन नसक्दा खेल टाइब्रेकरमा पुगेको हो ।
४६ औ मिनेटमा श्री नेपाल राष्ट्रिय माध्यमिक बिद्यालय निजगढका अर्पण गुरोले गोल गर्दै खेललाई बराबरीमा पुराएका थिए । टाइब्रेकरमा गौरीशंकरका गोलरक्षक सन्दिप थापाले दुई वटा बचाउ गर्दै टोलिलाई जित दिलाए ।
गौरीशंकरको जितमा महत्त्वपूर्ण भुमिका निर्वाह गरेका गोलरक्षक थापा खेलको म्यान अफ द म्याच घोषित भए ।
प्रतियोगिता अन्तर्गत सोमबार श्री गौरीशंकर माध्यमिक बिद्यालय सहिद चोक बि र श्री नेपाल राष्ट्रिय माध्यमिक बिद्यालय रतनपुरी बिच प्रतिस्पर्धा हुनेछ ।
निजगढ फुटबल क्लबको आयोजनामा संचालित प्रतियोगितामा निजगढ नगरपालिका भित्रका १० वटा बिद्यालयको १२ वटा टिमको सहभागिता रहेको छ ।
