लक्ष्मी खरेल
सिमरा । बारामा जारी वडा अध्यक्ष गोल्ड कप २०८० अन्र्तगत आजको खेल जित्दै बडहर्वा सेमिफाइनलमा प्रवेश गरेको छ । जितपुरसिमरा उपमहानगरपालिका वडा नं.१६ को डकाह खेल मैदानमा जारी प्रतियोगिताको आजको खेल मौवा देवी यूवा क्लब बडहर्वाले जितेको हो ।
फ्रेन्स यूवा क्लब बकुलियालाई ट्राईबेकरमा हराउँदै बडहर्वा सेमिफाइनल प्रवेश गरेको हो । निर्धारित ७० मिनटको खेलमा दुबै टिमबाट एकएक गोलको बराबरी भएसँगै खेल ट्रईबेकरमा धकेलिएको थियो । ट्रईबेकरमा बडहर्वाले ४–२ गोल अन्तरमा जित निकालेको हो ।
यो जितसँगै मौवादेवी यूवा क्लब बडहर्वाले सेमीफाईनलमा स्थान पक्का गरेको छ । पहिलो हाफको ३० मिनेटमा मौवादेवीका जर्शी नं.१२ का खेलाडी अविसान महत्तोले पहिलो गोल गर्दै टिमलाई अग्रता दिलाए पनि दोस्रो हाफको १३औं मिनटमा फ्रेन्स यूवा क्लब बकुलियाका सुशिल चौधरी गोल गरेसँगै खेल बराबरी भएको थियो । दुबै टिमका खेलाडीले पटकपटक पाएको अवसरलाई सदुपयोग गर्न नसक्दा खेल ट्राइब्रेकरमा धकेलिएको थियो ।
प्रतियोगिताको आजको खेलमा मौवादेवी यूवा क्लबका गोल रक्षक यूनेश चौधरी म्यान अफ दि म्याच घोषित भए । चौधरीलाई आयोजक मित्र यूवा क्लबका प्रतियोगिता संयोजक मोहन बहादुर आलेले पुरस्कार प्रदान गरेका हुन् ।
यसअघि सोमबार भएको उद्घाटन खेलमा आयोजक मित्र युवा क्लबले कलैया फूटबल क्लबलाई पराजित गर्दै बिजयी सुरुवात गरेको थियो । आयोजकले कलैयालाई ८–० को फराकिलो गोलअन्तरले पराजित गरेको हो ।
आयोजकको जीतमा कृपा चौधरीले एक्लैले ६ गोल गरे । कृपाको उत्कृष्ट खेलको मदतबाट फराकिलो जित हात पारेको आयोजकका लागि अविष्कार चौधरी र अन्जन बछारले एक÷एक गोल गरेका थिए । उद्घाटन खेलको म्यान अफ दि म्याच कृपा चौधरी घोषित भएका थिए । खेल तालिका अनुसार भोली बुधबार दिउँसो ३ बजे हुने खेलमा विरगञ्ज सिटी क्लब विरगञ्ज र ओझेल यूवा क्लब टाँगिया बस्तीले प्रतिस्पर्धा गर्नेछन् ।
जीतपुरसिमरा उपमहानगरपालिका वडा नं. १६ को सहयोगमा आयोजित प्रतियोगिताको विजेताले ५० हजार र उपविजेताले २५ हजार नगद सहित ट्रफि प्राप्त गर्नेछन् । प्रतियोगितामा बारा र पर्साका १२ टिमको सहभागिता रहेको प्रतियोगिता कार्तीक ३ गते सम्म चल्ने छ ।
